blogoccitanbarral

Tot se passèt a la debuta de las vacanças de febrièr, enfin de las vacanças en Lengadòc perque en Provença i èran pas encara en vacanças... Doncas, aprèp de meses de preparacion, de vendas de còcas per finançar las activitats e los trajèctes en bus, d'atacs de nèrvi per saber dins quinas familhas anirián los correspondents, los collègas de Provença son arribats en çò nòstre, plan planet (aprèp aver espotit un paure gos a Sant Pons ... non, es pas vertat, èra la galejada per explicar lor retard ...!)
Agachatz las fòtos : faràn enveja a los/las qu'i èran pas e rapelaràn de bons sovenirs a los qu'i èran !


Aprèp lo dinnar, per dire de far la digestion, Francesa de Fanti - qu'es professora de dança e cantaira dins lo grop Landiridi- nos aprenguèt a plaçar la votz per plan cantar (vos trufètz pas se vos plai ...) e a dançar la borrèia, la polcà e l'escòtich. Un grand moment de concentracion coma podètz veire sus las fòtos ...

Per commemorar lo uèit centen aniversari de la crosada -l'an que ven-, Macarèl organisa un concors d'idèas.
Cal trobar siá un ESLOGAN que començarà per    " 1209-2009 :  "......", siá far un dessenh sul tèma 1209-2009 ( amb 4 colors) Las produccions son de mandar sul siti de Macarèl  (       http://www.macarel.org  ) abans la fin de febrièr.

Demest los prèmis de ganhar i a de bons de 150€ per crompar de causas de Macarèl e un sejorn totes fraisses pagats a las Estivadas de Rodés.

Vos demòra pas pus qu'a vos curar lo cervèl macarèl !!!

La promocion Rostropovitch se la pòt petar grèu : los Terminalas OCCITAN venon d'obtener una mejana ISTORICA de 16,5 a l'opcion occitan del bac ! OSCA , se meritan las felicitacions e son un exemple bèl per la promocion que monta ...!

       

                                                                                                       Lo dissabte 14 de junh, los catalans e los occitans se son recampats per festar amassa la Sant Joan a Montsegur. Agachatz las fotòs de la fèsta :
 


Los occitans e los catalans s'encaminan cap al Prat dels Cremats (ont en 1244 , 240 catars foguèron cremats)






Despausan una garba de flors (que sas colors, jaune e roge, son las de la bandièra occitana e catalana) al pè
del monument bastit per onorar la memòria dels
martirs.




Los tambors e lo grop catalan dels Ministrers de Vilanòva
rescaufan l'ambient ( cal dire que fasiá un pauc fresc ongan a Montsegur ...)


.
. 


                                Lo passacarrièra a Montferrièr (un vilatjòt a costat de Montsegur)
                                                                         

 La còla dels Diables de Barcelona ( s'apèlan La Malèfica del Coll) fan de fuòcs d'artifici : es subrebèl !




Un escapolon de l'espectacle
de pirotecnia dels Diables de
 Barcelona ,



Lo fuòc es alucat amb las entòrchas e, d'aquel temps, lo grop demusica Zinga-Zanga jòga de musica occitana e lo baleti pòt començar !

Avèm una novèla de las bonas a vos dire : l'associacion Enjòc ( ENsems, Joves OCcitans !) es nascuda fa doas setmanas ! Lo logò es estat creat per Anaïs :

  Es  polit, e  ?... E puèi, i a Adrien e Morgan, de 2da, que trabalhan coma de calucs per far lo siti internet d'Enjòc : vos direm quora serà operacional.
Mas vos demandatz, solide : macaní ! de qu'es aquò Enjòc ??!!!
Alara es coma "Copains d'avant" e "Face book" mas plan mièlhs ( normal, es occitan ...!) : serà un malhum entre totes los joves que se consideran occitans ( emai se parlan pas la lenga). Sul siti, i aurà d'anuaris per annada amb las adreiças electronicas que seràn mesas a jorn per poder gardar lo contacte amb los amics; segur, i aurà un foròm de discutida; de ligams amb d'autres sitis; d'entresenhas suls concèrts, sus las manifestacions, suls rencontres, e tanben de possibilitats de far de corespondéncia e d'escambis amb los joves d'Occitània tota e de Catalonha , de las Valadas Italianas e d'endacòm mai. E farem de reclama als esponsòrs que nos ajudaràn ( e direm tanben se i a d'entrepresas que nos volguèron pas ajudar ...) perque, los sòcis d'Enjòc ( la carta còsta pas qu'un eurò ) auràn dreit a d'avantatges :
REBAISSES dins de botigas, possibilitat de far d'estagis professionals e de se trapar un trabalh per l'estiu eca.
Enjòc es nascut a Castras lo 22 de mai de 2008 : es la debuta d'una aventura. Va s'espandir dins Tarn, puèi dins los autres despartaments de Mièg-Pirenèus, e dins Occitània tota. L'amira es d'èsser de milierats . La nòstra devisa ? Ensemble, sèm una fòrça !
Lèu, poiretz trapar sul blòg l'adreiça del siti d'Enjòc e poiretz venir sòcis. Paciéncia ...